آپارتومان دا قونشویوق، بیلمیری هئچ آدیم نه دی

توش دو، شیرین دی یا آجی بیلمیری کی دادیم نه دی ؟

پیلله یولو بیر دی ولی مرتبه لرده فرق وار

محوّطه دولو زیبیل ، ائو ایچره زرق و برق وار

اوسته کی ائولردن بیری زیبیل قابین نیشان گئدیر

زیبیل دوشوبسه پاتلاییر دالینجا یوز پیشان گئدیر

پیلله لری چیخا- چیخا سیگار چکیب سالیب ازیر

آغریماسین او اللری پیلله لری گؤزه ل بزیر

ناهار هامی یاتان زامان اوشاقلاری ائشیکده دیر

هارای سالیرلار آخ نئجه بیرَم – بیرَم کئشیکده دیر

پیلله لری یئنیر ائله ، آدام دئییر ییخیلدی دام

صبحانه دی یئیه ن زامان ازیرله گیرده کان – بادام

قونشولاری گره ک بیله ، بو قونشونون دا ضبطی وار

اگر بیزه قویور کیلاس ، بوگوپ گوپا نه ربطی وار

رادیولونان آراسی یوخ ، تی وی سنی آچار اوجا

او هئچ رعایت ائیله مز قونشودا وار مریض – قوجا

بیر کره گلدیک اوز – اوزه ، سلامیم هئچ ده آلمادی

مینیب ابو قوراضه سین گؤزومدن ایتدی قالمادی

ماشین دا آد گلیب دئییم ، سیقنالی ایله دنگ ائله ر

ائو آدامین چاغیرماغا سیقنالی ایله زنگ ائله ر

سسلَر اوشاغی های هارای، هئچ قوروماز سولو – ساغی

ایسته یر او تئز گئیینیب یئیینجه گلسین آشاغی

سؤز لری نظمیله دن دئدی ، سیزلره ایندی آ « ممی»

دئییب بیزه رسولوموز « ائودن اوَل قونشو» عمی !